Анастасия Петровна Лыткина аатынан уулусса арыллара бигэргэннэ.
Балаҕан ыйын 11 күнүгэр 24-с нүөмэрдээх Чурапчы нэһилиэгин депутаттарын сессиятыгар 118-с нүөмэрдээх быһаарыытынан Чурапчы нэһилиэгин биир кэрэ миэстэтигэр, Саха омук киэн туттан, уос номоҕо оностон кэпсиир, тарбахха баттыыр аатырбыт ырыаһыттарыттан биирдэстэринэн бастакы анал консерваторскай үөрэхтээх идэтийбит ырыаһыт, төрөөбүт норуотун вокальнай искусствотын аан маҥнай кыраныысса таһыгар, аан дойду таһымыгар таһаарбыт РСФСР уонна САССР үтүөлээх артистката, биир дойдулаахпыт Анастасия Петровна Лыткина аатынан уулусса арыллара бигэргэннэ.
Үөрүүлээх тэрээһин эһиил 2026 сылга, кулун тутар 22 күнүгэр былааннанна.
Алаҕар ааҕар киинэ Анастасия Петровна Лыткинаҕа аналлаах выставка туруорда. Анастасия Петровна Лыткина кэрэтик, сэмэйдик түспүт хаартыскалара, кини олоҕун, үлэтин, ханна кыттыбытын туһунан бэчээттэнэн тахсыбыт кинигэлэр бу выставкаҕа турдулар.