« Эдэр сааһым кэмнэрэ — Комсомол»
Бүгүн, алтынньы 29 күнүгэр, нэһилиэкпитигэр Комсомол тэриллибитэ 107 сылыгар аналлаах « Эдэр сааһым кэмнэрэ — Комсомол» диэн тэрилтэлэр икки ардыларыгар ток — оонньуу буолан ааста.
Бу күн, манна мустубут дьон, эдэр эрчимнээх саастарын санаан, араас « комсомольскай» хабааннаах боппуруостарга эппиэттээтилэр, урукку кэминээ5и ырыалары ыллаан, ыллаһан эдэрдэригэр төннөн ыллылар.
Оонньууну Алияна Баишева «Аалай уоттаах сулуһум» ырыаны толорон, кэлбит дьон тэҥҥэ ыллаһан , сүргэлэрэ көтөҕүлүннэ.
Хамаандалар кыттарга олус бэлэмнээх кэлбиттэрэ тэрээһини өссө киэргэттэ. Ол курдук, ох курдук оҥостон сорохтор кыһыл былаат баанан, сорохтор түөстэригэр Улуу Ленин мөссүөннээх значогу иилинэн, маҥан ырбаахы кэтэн киирбиттэрэ көрүөххэ үчүгэйин.
Оонньуу 5 түһүмэҕинэн ыытылынна. Хамаандалар бары тэҥ кэриэтэ эппиэттэстилэр.
Балаһыанньа быһыытынан бэтэрээн үлэһиттэр үлэлээбит тэрилтэлэрин аатыттан кытыннылар. Түһүмэх боппуруостара бииртэн биир сытыырхайан истэ, ону таһынан хамаанда хапытааннарыгар туспа түһүмээ баара олус долгутуулаах буолла.
Түмүккэ үһүс миэстэ5э та5ыста «Алгыс» уһуйаан кэлэктиибэ. Иккис миэстэ5э биир очукуонан хаалан кыра тэрилтэлэр холбоһуктаах хамаандалара уонна кыайыылаах үрдүк аатын Г. Д. Протодьяконов аатынан Ала5ар орто оскуолатын кэлэктиибэ ылары ситистэ.
Оонньууну тэрийээччилэринэн нэһилиэк бибилэтиэкэрэ Софья Егоровна Протодьяконова уонна Светлана Афанасьевна Борисова маннык интириэһинэй боппуруостары толкуйдаан, тобулан, оонньуу бэрт сэргэхтик ыытылынна. Уустуга суох оонньууну дьүүллээтилэр Полина Николаевна Дьячковская, Ирина Гурьевна Оконешникова уонна Татьяна Иннокентьевна Барашкова.
Дьиэ5э олорор а5ам саастаах дьоммут оонньууга кэлэн кыттан, эппиэттэһэн, сэргэхсийэн, өссө да маннык оонньууларга кыттар ба5алаахтарын этэн, үөрэн — көтөн тар5астылар.
Тэринэн кэлбит хамаандаларга ба5арабыт өрүү маннык актыыбынай буоларгытыгар, тэрийээччилэргэ өссө да ситиһиилээх айар- тутар үлэни. Барыгытыгар чөл чэгиэн доруобуйаны, эдэрдии эрчими!
Барашкова Т.И. Алтынньы 29 күнэ
