Алагарская модельная библиотека

Саха тыла Амма Аччыгыйа эппитин курдук «Сир симэ5ин курдук сиэдэрэй, үрүйэ уутун курдук ыраас», Күндэ эппитинии « Сөрүүн сүөгэй курдук сүрэ5и быары сөрүүргэтэр».

Киһи айыл5алыын сүрүн ситимэ, чуолаан, төрөөбүт тылыгар сытар. Саха киһитин биир уратыта кини атыттартан атыннык, сахалыы толкуйдуура буолар. Биьиги сахалар а5ыйах ахсааннаах норуот буолан баран, туохха барытыгар сыста5ас омукпут. Ол эбэтэр сонургуу көрбүппүтүн барытын билэ-көрө сатыыр идэлээхпит. Ол сылдьан бэйэбит билбэппитинэн төрөөбүт тылбыт умнууллууга киирэр турук буолан эрэр диэн дьиксинэр буоллулар. Оттон төрөбүт тылын билбэт киһи кута чарааһаабыт буолан, куттас туруктанар, доруобуйата айгырыыр, өйүн-санаатын ыыра кыарыыр эбит.

Биьиги сахабыт тыла олус баай, дириҥ историялаах, атын омук тылларыгар холоотоххо олус кэрэтик иьиллэр тыл. Тылбыт суппэтин, симэлийбэтин туьугар ,кэлэр кэнчээри ыччаппытын, сахалыы тыыннаан, үтүө сиэргэ – майгыга угуйан, төрөөбүт тылбытын ыьыктыбакка инникигэ эрэллээхтик илдьэ сылдьыахтаахпыт.

Саха тылбытын уһуннук кэтээн көрбүт дьоннор этиилэринэн, сахалыы дьоһуннук толкуйдуур, саҥарар – иҥэрэр ыалга иитиллибит о5о үтүө майгылаах сиэрдээх киһи буолан улаатар. Мин саныахпар ,төрөөбүт тылынан көҥүллүк саҥара үөрэммит о5о атын омук тылын тургэнник ылынар, иннигэр эрэлэ быдан тардыһыылаах буолар. Оттон сахалыы тылы билбэт саха о5олорун көрдөххө, куннээ5инэн толкуйдаах, уьуну – киэҥи ырыта барбат, быстах майгылаах буолар курдуктар. Онон сибээстээн, о5о кыра эрдэ5иттэн төрөөбүт тылынан иитиллэр эйгэтин кэҥэтэн хайаан да өйтөн хоһооннору, остуоруйалары кэпсиир үөруйэ5и киллэрэр наада. Маннык тугэҥҥэ о5о этэр санаатын сааһылана, тыл баайын эгэлгэтин туьана, толкуйдуур дьо5урун сайыннара үөрэнэрин ситиһэллэр. Ити курдук кыра тугэннэртэн са5алаан иитиллибит ийэ тылбыт сүөгэйин-сүмэтин иҥэрэн, киһилии киһини иитэргэ олук уурарга кыьаллыа5ын. Төрөөбүт тыл үөрэх, иитиитин тыла буолар аналлаах.

Олунньу 13 кунэ «Саха тылын уонна суругун» күнүнэн биллэр. Бу бырааhынньык бастакы сахалыы суругу-бичиги олохтообут учуонай Семен Новгородов аатын сугэр. Бу күн биhиги Сахабыт сиригэр сыл аайы бэлиэтэнэр.  15 сыл аннараа өттутугэр бу күн Саха республика бастакы  президиэнин Михаил Ефимович Николаев  уураа5ынан олохтоммута.                

Республика үрдүнэн саха тылыгар анаммыт араас концертар, көрсуhуулэр киэн хабааннаахтык ыытыллаллар.

Төрөөбүт тыл — саха киһитин оло5ор, инники кэскилигэр  тэҥҥэ кыттар иэйиитэ, тобулаан таһаарар өркөн өйө, духобнаһа, төрүт обугэбит удьуорун, силиһин – мутугун быстыспат ситимэ.

Саргылаах сахабыт тыла сайда уунэ туруохтун!

Ыстатыйаны суруйда Алаҕар нэһилиэгин библиотекаря,

 Протодьяконова Софья Егоровна.