«Норуот дьоруойа» Саха Өрөспүүбүлүкэтин библиотеката уонна Алаҕар нэһилиэгин библиотекатын выставката.
Ыам ыйын 7 күнүгэр сарсыарда 10 чааска Саха сирин уонна Чурапчы улууһун олохтоохторугар кэрэ-бэлиэ түгэнинэн буолбут Норуот Дьоруойа, снайпер, артиллерист, РСФСР норуотун үөрэҕириитин туйгуна, буойун, суруйааччы, учуутал, Чурапчы улууһун киэн туттар бочуоттаах киһитэ Гавриил Дмитриевич Протодьяконов төрөөбүтэ 115 сылыгар аналлаах өйдөбүнньүк пааматынньыгы Дьокуускай куоракка Кыайыы пааркатыгар үөрүүлээх быһыыга-майгыга өрө көтөҕүллэн туран арыйдыбыт!
Маны таһынан, Өрөспүүбүлүкэтээҕи национальнай уонна Алаҕар нэһилиэгин библиотекалара кэлбит ыалдьыттарга кинигэ быыстапкатын туруордулар, өйдөбүнньүк буклет туттардылар. Быыстапканы сырдатан сиһилии кэпсээтэ Саха Өрөспүүбүлүкэтин библиотекатын краеведение отделын сүрүн Библиотекара Екатерина Ивановна Попова. Г.Д.протодьяконов олоҕун, наҕараадатын туһунан оҥоһуллубут буклеты Алаҕар нэһилиэгин библиотекара Софья Егоровна Протодьяконова дьоҥҥо-сэргэҕэ ис хоһоонун кэпсээн, билиһиннэрэн бэлэх туттартаата.
