АЛАҔАР НЭҺИЛИЭГЭР «ДОРООБО САЙЫН».
Кэлбит самаан сайын уонна Саха дьонун ытык бырааһынньыга Ньукуолун күнэ Алаҕар нэһилиэгэр үөрүүлээхтик ыам ыйын 22 күнүгэр бэлиэтэннэ. А.П.Лыткина аатынан ДНТ «ЫРЫА» киинин площадката дьону-сэргэни түмэн, «ДОРООБО, САЙЫН!» диэн үтүө, чаҕылхай тэрээһин ыытылынна.
Тэрээһин сахалыы үгэстэри сөхсүтэн, дьоһуннук саҕаланна. Мустубут дьон бары бииргэ үрүҥ Айыылартан үтүөнү-кэрэни, уйгу быйан ардаҕа өлгөм үүнүүнү, күн уота сылыйан дьолу-соргуну тосхойун диэн алгыс тылын анаатылар.
Кэнсиэр чааһыгар «Кэрэҕиҥ сайын» диэн ааттаах эҕэрдэ нүөмэрдэр бэлэхтэннилэр. Олохтоох талааннаахтар сайыҥҥы иэйиини ырыанан-тойугунан, үҥкүүнэн-битиитинэн тириэртилэр. Оҕолортон кырдьаҕастарга диэри бары кыттыыны ылан, дьон-сэргэ сүргэтин өрө көтөхтүлэр.
Ону таһынан, библиотекарь Софья Егоровна тэрийиитинэн, араас темалаах быыстапкалар дьон болҕомтотун тартылар. Манна «Аптаах киистэ» куруһуок үлэлэрин быыстапката, сайыҥҥы айылҕа кэрэтин көрдөрөр хартыыналар уонна хоһооннор хомуурунньуктара бэлэмнэнэн, дьон дууһатын астыннардылар.
Дьаарбаҥка да умнуллубата. Рассаада дьаарбаҥката аана аһаҕас буолан, дьон үүнүүгэ бэлэмнэнэн, сөптөөх рассаданы ылынан атыыласта, атыылаата.
Тэрээһин түмүгэр, Ньукуолун күнүн үгэһинэн, бары мустубут дьон сып-сылаас, минньигэс кус миининэн күндүлэннилэр. Булчуттар байанайдара бэрсибит кустарыттан буһарыллыбыт кус минэ дьон сүргэтин өссө көтөхтө, сэниэҕэ-сэниэни эптэ.
Бары мустубут дьон үөрэн-көтөн, саҥа күүһү ылан тарҕастылар. «ДОРООБО, САЙЫН!» тэрээһин Алаҕар нэһилиэгин олохтоохторугар сайыҥҥы сылаас, үтүө иэйиини бэлэхтээтэ. Маннык үтүө тэрээһиннэр элбэхтик ыытылла турдуннар диэн баҕа санаа хаалла.
