Сэрии албан аатын күнэ уонна Японияны утары сэриилэспит Алаҕарбыт буойуттара
Бүгүн, балаҕан ыйын 3 күнэ, Россияҕа улахан суолталаах күн – «День Победы над милитаристской Японией и окончания Второй мировой войны (1945 год)» диэн сэрии албан аатын күнэ. Бу күн – Иккис аан дойду сэриитин тиһэх түмүгүн, Японияны кыайыыны уонна дьолломмут эйэлээх олоҕу кэрэһилиир.
1945 сыл балаҕан ыйын 2 күнүгэр «Миссури» диэн линкорга Япония капитуляциятын актыга илии баттаммыта. Бу түгэн Аан дойду устуоруйатыгар хаһан да умнуллубат дьылҕаны быһаарбыта – Иккис аан дойду сэриитэ дьиҥнээхтик түмүктэммитэ. Бу улуу Кыайыыны чиэстээн, 1945 сыл балаҕан ыйын 3 күнүгэр ССРС-ка Японияны кыайыы бырааһынньыга олохтоммута. Оттон 2023 сыл бэс ыйын 24 күнүгэр Россияҕа бу кэриэстэбил күн билиҥҥи аата сокуон быһыытынан бигэргэтиллибитэ.
Биһиги, Алаҕар нэһилиэгин олохтоохторо, бу күн ураты истиҥник уонна дьоһуннаахтык ахтан-санаан ааһабыт. Тоҕо диэтэххэ, Алаҕарбыт сириттэн-уутуттан төрөөбүт-үөскээбит, дойдуларын көмүскээбит, Японияны утары сэриилэспит хорсун буойун уолаттарбыт бааллар, Лыткин Афанасий Никитич, шеломов николай Васильевич, Турантаев Гаврил Григорьевич, Турантаев Григорий Григорьевич. Кинилэр кыргыс хонуутугар хорсуннук сэриилэһэн, Улуу Кыайыыны уһансыбыттара.
Кинилэр ааттара, кинилэр хорсун быһыылара хаһан да умнуллуо суоҕа. Кинилэр биһиги дьолбут, эйэлээх олохпут туһугар бэйэлэрин олохторун харыстаабакка кыргыспыттара. Аҕа уустарын, ийэ дойдуларын көмүскээбит хорсун буойуттарбыт сырдык кэриэстэригэр сүгүрүйэбит!
Бу күн Алаҕар нэһилиэгин хас биирдии ыала, хас биирдии киһитэ Японияны утары сэриигэ кыттыбыт буойуттарын ахтан, сырдык тылларынан ытыктаан ааһыаҕа диэн эрэнэбит. Кинилэр ааттара үйэлэргэ ааттаныахтун!
Убастабыллаах алаҕар нэһилиэгин олохтоохторо, нэһилиэкпит бибилэтиэкэтигэр кэлэн, биһиги буойуттарбыт тустарынан кинигэлэри көрөн ахтан-санаан ааһыаххытын сөп.
Алаҕар бибилэтиэкэрэ Софья Протодьяконова
