«ДЬҮҺҮЙЭР ТЫЛ, ОЙУУЛУУР КИИСТЭ» выставка.
Муус устар бастакы күнэ Чурапчы улууһун, Е.А. Борисов аатынан киин бибилэтиэкэҕэ ураты иэйиилээх, кэрэни кэрэхсээччилэри түмэр «Дьүһүйэр тыл, ойуулуур киистэ» диэн ааттаах быыстапкабыт арыллыыта олус истиҥник, дууһалыын долгутуулаахтык ааста.
Ыалдьыттарбыт киирэн кэлээттэрин кытары, библиотека иһэ ураты тыыннанан, дьикти дьүһүннээх иллюзия эйгэтигэр киирбиккэ дылы буоллулар. Биир өттүгэр — саабыла быһыытынан охсуллар хоһоон тыла, атын өттүгэр — киистэ дьикти дьүһүннээх уруһуйдара. Бу икки искусство биир ситимҥэ холбоһон, ааҕааччы уонна көрөөччү дууһатын арыйар, саҥа сарыалы саҕар күүстээх дьайыылаах буолла.
Бу дьикти көстүү кэннигэр Алаҕар нэһилиэгин киин бибилэтиэкэтин иһинэн үлэлиир «Аптаах киистэ» куруһуога турар. Куруһуокпут кыттааччылара уруһуй уонна литература нөҥүө бэйэлэрин иэйиилэрин, уйулҕаларын кэрэтик арыйаллар. «Аптаах киистэ» – бу киэҥ куйаарга тардыһар, айар куту уһугуннарар уонна дьону биир санааҕа түмэр дьиҥнээх айар үлэ уйата. Дьон-сэргэ бу быыстапканы олус сэргээтэ, хас биирдии үлэни тохтоон туран, дириҥ ис хоһоонун ырытта. «Тыл уонна киистэ бииргэ үлэлээн, хайдах курдук кэрэ иллюзияны айарын» бары биир киһи курдук сөхтүбүт, айар дьоҕур киһи ис туругун хайдах курдук кэрэтик арыйарын бары билиннибит. Бу күн библиотекабыт дьиҥнээх айар кииҥҥэ, санаа атастаһар, дууһалыын кэпсэтэр үтүө түгэннэргэ кубулуйда.
Бу выставка — киһи киһилии кэрэни көрөр, толкуйдуур уонна сайдар кэрэ аартыга буолар.