Е.А.Борисов аатынан улуустааҕы киин бибилэтиэкэ-архыыпка Иннокентий Левин — Ньээчис «Эһиэхэ аныыбын күн уотун» кинигэтин сүрэхтэниитэ буолла.
Кэбээйиттэн төрүттээх, Чурапчыга олорбут Иннокентий Наумович саха литэрэтиирэтигэр биир биллэр-көстөр суолу хаалларбыт суруйааччы. Кини аймаҕа, балта Альбина Петрова талааннаах бэйиэт, прозаик, кириитик суруйан хаалларбыт рукописьтарын хомуйан, эрэдээктэрдээн кинигэни таһааттарда. Үөрүүлээх тэрээһиҥҥэ Кэбээйи улууһуттан 10-тан тахса киһилээх дэлэгээссийэ, ол иһигэр Иннкентий Левин аймахтара, кинигэ эрэдээктэрэ Альбина Васильевна, норуодунай суруйааччы, Иннокентий Левин доҕоро, үөлээннээҕэ С.А.Попов-Сэмэн Тумат кэлэн кыттыыны ыллылар.
Кэбээйи улууһун баһылыгын эбээһинэһин толорооччу, Чурапчыттан төрүттээх Александр Сивцев, Чурапчы улууһун баһылыгын социальнай боппуруостарга солбуйааччыта Мария Кронникова эттилэр, хардарыта Махтал суруктары, бэлэхтэри туттардылар.
